1981 jyldyń jazy Selınograd stansasyndaǵy jelilik bólimdegi izdeýshiler tobyna taǵy da bir synalar syn saǵaty týdy.
Eger stansaǵa kelgen vagon, sısternalardyń plombalary buzylǵan bolsa nemese onda naqty qylmys jasalǵany baıqalsa, stansa qyzmetkerleri men transporttyq mılısııa bóliminiń qyzmetkerlerinen qurylǵan komıssııa júk qabyldaýshyǵa kelgen júkti tasymaldaý tártibi boıynsha sanymen nemese salmaǵymen ólshep tapsyrýǵa tıis.
Al júk qabyldaýshylardyń biri – Selınograd qalasyndaǵy araq-sharap zaýyty bolatyn. Sol jyly atalmysh zaýytqa kelgen spırt quıylǵan sısternalarda jappaı jetispeýshilik baıqala bastady. Ár spırt jetispegen sısternaǵa kommersııalyq aktiler túzilip, atalǵan bólimge izdestirýge jiberilip jatty. Bul materıaldar boıynsha izdestirý sharalary aǵa ınspektor Súleımenovke tapsyryldy.
Materıaldardaǵy «jalpy aktilerdiń bárinde» «sısterna kelgen bette onyń plombalary men lıýkterdi baılaǵan symdarynyń joqtyǵy anyqtaldy», dep jazylyp turdy. Sondyqtan biraz ýaqytqa deıin álgi kommersııalyq aktiler sısterna kelgen poıyzdyń júrý grafıgi boıynsha Selınograd stansasyna deıingi toqtaǵan stansalarǵa jiberildi. Biraq olar tekseris júrgizip, jaýap bergenshe biraz ýaqyt ótetin edi. Sol sebepten bastapqy is-áreketter nátıjesiz boldy.
Sondyqtan «saraptaý parkiniń» jumysyn qadaǵalaý jedel topqa júkteldi. Araq-sharap zaýytynyń jumysshylary da baqylaýǵa alyndy. Osy jumystardyń barysynda túsken materıaldardy saraptaı otyryp, araq-sharap zaýytyna baratyn qysqa temir jol boıyna torýyldar qoıylyp, sısternalardyń ótý grafıgin tekserý mindetteldi. Bul amal óz jemisin berdi.
Sodan baqylaý negizinde stansa jaqtan kele jatqan kezekti lokomotıvtiń jaryǵy kórindi. Araq-sharap zaýytyna baratyn tuıyq jol boıynda jalǵyz úı bolatyn, onda jasy úlken bir keıýana turýshy edi. Sol úıdiń tusyna jaqyndaǵan kezde álgi lokomotıv sońyna tirkegen eki sısternasymen baıaýlap kelip toqtady. Jedel top túnde kóretin quralmen baqylap qarasa, sısternanyń ústinde bir kisi qunjyńdap birdeńe istep jatyr eken, al arǵy betinde ne bop jatqany kórinbedi. Múlik qorǵaý bóliminiń bastyǵy A.Kokanov óte saqtyqpen baqylaý ornyn aýystyryp, arǵy betinde ne bolyp jatqanyn qarap, úsh-tórt adam kanıstr, flıaga tasyp jatqanyn baıqaǵan soń, jedel topqa qaıtyp kelip: «10-15 mınýt kúteıik, sosyn baraıyq», – dedi.
Sál kútkennen soń, eki adam lokomotıvke, qalǵan toǵyz adam arǵy bettegi úıge bet aldy. Álgi úıge kirse, úsh temirjolshy men úı ıesi ústel basynda araq iship otyr eken. Úı ishinde aıtarlyqtaı jıhaz joq. Eki bólmeniń birinde kanıstr, flıaga, bıdondar tolyp tur. Iship otyrǵandary da spırt bolyp shyqty. Jańaǵy ydystardyń barlyǵy tolǵan spırt.
Sodan soń jedel top stansa kezekshisine lokomotıv brıgadasynyń ustalǵanyn habarlap, olardy mılısııa bólimine alyp barady. Tergeý amaldary júrgizilip bolǵannan keıin is sotqa joldandy, biraq is birneshe ret qaıta tekserýge jiberildi.
Aqyry urylar spırt urlyǵyn moıyndap, qylmystyq is qaıta qaralyp, kólik prokýratýrasynyń bekitýimen sotqa jiberildi. Sotta urylar tıisti jazasyn alyp, bas bostandyqtarynan aıyryldy.
Amangeldi ARYSTANBEKOV
ASTANA